شورکوٹ

ضلع جھنگ کا انتہائی قدیم شہر اور ایک تحصیل، دریائے چناب سے تقریباً 7 کلومیٹر اور جھنگ سے تقریباً 55 کلومیٹر کے فاصلے پر واقع ہے۔ تاریخی لحاظ سے یہ شہر اتنا ہی قدیم ہے جتنا ہڑپہـ سکندر اعظم کے وقت “سورین” کہلاتا تھاـ بنیادی طور پر اس زمانے میں یہ ملتی یاسیوی ریاست کا ایک اہم شہر تھا جسے سکندرِ اعظم نے بھی 325 ق م میں فتح کیا تھاـ رگ وید میں سیوی کا ذکر ملتا ہے جو اسی نارا کا بیٹا تھا اور جس نے جھنگ کے نواح میں سیوی ریاست کی بنیاد ڈالی تھی اور اپنے نام کا ایک شہر آباد کیا تھاـ سیوی ریاست کا دامن سندھ کے موجودہ شہر سیوی سے لے کر جھنگ اور شورکوٹ تک دراز تھا اور یہی وہ ریاست جو رگ وید کی ہمعصر بھی تھیـ ایک وقت وہ بھی آیا کہ جب اس ریاست میں بادشاہت ختم کر دی گئی تھی اور اس کی جگہ جمہوریت نافذ کی گئی تھیـ چنانچہ اس کے ایک راجہ کو عوام نے محض اس بناء پر جلا وطن کر دیا تھا کہ اس نے ایک ہاتھی کلنگا کے برہمنوں کو بخش دیا تھاـ ہاتھی اس زمانہ میں قومی ملکیت مقرر ہوئے تھےـ چونکہ آرین نئے نئے اس ملک میں آئے تھے اور ہاتھیوں کی تعداد بھی زیادہ نہ تھیـ اس لیے عوام کے نزدیک ہاتھی بہت قیمتی شے تھے اور اتنی قیمتی شے کو کوئی بادشاہ کسی بیرونی برہمن کو بخش دے، عوام اسے حق تلفی سمجھتے تھے 38۔شورکوٹ انتہائی قدیم شہر ہےـ اشوکِ اعظم کے زمانے میں جب بدھ مت کو فروغ حاصل ہوا تو اس نے جگہ جگہ مندر تعمیر کرائےـ ان میں ایک مندر شورکوٹ میں بھی تعمیر کرایا گیاـ جسے ہڈھو آنہ مندر کہا جاتا ہےـ یہاں سے اس دور کی مٹی کی مورتیاں، تانب کے سکے جن پر ایک طرف مہاتما بدھ اور دوسری طرف اشوک کی شبیہ کندہ ہیں برآمد ہوئیں 39۔ مورخین کے مطابق یوچی اور کشان قبائل کے خلاف ہندوستان کے عظیم بادشاہ بکرماجیت کی فیصلہ کن جنگ کروڑ پکا، شورکوٹ اور ملتان کے علاقے میں ہوئی تھیـ شورکوٹ قلعہ سے ایک ایسی تختہ برآمد ہوئی ہے جس پر بکرماجیت کی فتح مندی کے بارے میں عبارت درج ہےـ اس شہر کو تقریباً تیرھ سو سال قبل سفید ہن قبائل نے تباہ کیا تھاـ دوبارہ یہ شہر پرانے تباہ شدہ شہر کے ٹیلے کے قریب آباد ہواـ اس کے اردگرد آج بھی بے شمار قدیم آثار پائے جاتے ہیںـ اس شہر کو دسویں صدی عیسوی میں ازسرنو آباد کیا گیاـ مشہور چینی سیاح ہیون سانگ نے بھی اس شہر کا چھٹی صدی میں دورہ کیا تھاـ اس نے اس شہر کا ذکر کرتے ہوئے لکھا ہے کہ اس کے شمال کی طرف ٹاکی صوبہ، جنوب کی طرف ملتان، جنوب مغرب اور مشرق کی طرف سندھ اور ستلج کے دریا تھے اور یہ 1332 مربع کلومیٹر پر پھیلی ہوئی ریاست کا مرکز تھا جبکہ جنرل کننگھم نے اس کا رقبہ 852 مربع کلومیٹر ظاہر کیا ہےـمحمد بن قاسم کے حملہ کے نتیجے میں شورکوٹ بھی مسلمانوں کے ماتحت آ گیا تھا اور یہاں جلال الدین محمود کو گورنر مقرر کیا گیاـ ان کی وفات پر یہاں کا حاکم امیر داؤد طائی مقرر ہواـ لیکن وہ خرابیِ صحت کی بنا پر دو سال بعد واپس عراق چلا گیاـ محمد بن قاسم کے حملہ سے لے کر قرامطہ تحریک تک بہت سے مسلمان گورنر گزرے مگر ان میں جنید بن عبدالرحمٰن تمیم، حکیم بن حونہ، عمر بن محمد، منصور بن جمہور زیادہ معروف ہیںـ مورخین نے خاص طور پر جنید حاکمِ شورکوٹ کی تعریف کی ہےـ محمود غزنوی کے حملہ ہندوستان کے دوران شورکوٹ بغیر کسی مزاحمت کے فتح ہواـ فتح کے بعد اسے ریاست چنیوٹ میں شامل کر لیا گیا 40۔ جہاں تک اس کے نام کا تعلق ہے تو اس بارے میں مختلف آرائیاں کی جاتی ہیںـ ایک روایت یہ ہے کہ اسے “راجہ شور” نے آباد کیا تھا اور اسی کے نام پر اس کا نام شورکوٹ پڑاـ دوسری رائے یہ ہے کہ یہ علاقہ شور زدہ ہونے کے باعث اسی نام سے مشہور ہواـ جبکہ تیسری روایت کے مطابق یہاں حضرت تاج الدین شوری کا مزار ہے جو محمود غزنوی کے زمانے میں غیر مسلموں کے خلاف چلائی جانے والی مہم میں شہید ہو گئے تھےـ انہی کے نام کی نسبت سے شورکوٹ کہلوایا 41۔ حضرت تاج الدین پیر غازی کے مرید تھے جن کا مزار شورکوٹ کے قریب ہی واقع ہےـ آئینِ اکبری میں بھی شورکوٹ کا ذکر موجود ہےـ یہاں پرانے وقتوں کا ایک قلعہ بھی ہےـ حاکمِ ملتان نواب مظفر خان نے اس قصبہ کی آبادی کی طرف کافی توجہ دی اور بہت سی تعمیرات یہاں کروائیںـ سلطان بلبن کے دور میں شورکوٹ صوبہ ملتان میں شامل تھا اور یہاں محمد بلبن گورنر تھاـ حضرت امیر خسرو اس کے مشیر مقرر کیے گئےـ امیر خسرو گورنر ملتان کے مشورے سے کچھ عرصہ اوچ میں رہےـ پھر دیپالپورپاکپتن میں قیام کیا۔ 1280ء میں شورکوٹ آئےـ یہاں کے پہلے مسلمان گورنر جلال الدین محمد غازی کے مزار پر حاضری دی اور سلطان محمد تغلق خسرو شورکوٹ میں ہی تھےـ یہاں محمد بلبن اور تیمور کے درمیان راوی کے کنارے زبردست جنگ ہوئی جس میں محمد بلبن قتل ہو گیاـ تیمور نے شورکوٹ پر قبضہ کر لیا اور حضرت امیر خسرو کو گرفتار کر کے ساتھ لے گیاـ دو سال بعد انہیں رہائی ملیـ تیمور نے شورکوٹ کے آس پاس آبادی تہ و تیغ کی اور بہت سا سامان و اسباب لوٹاـ سلطان تیمور نے اپنی فتح کی خوشی میں شورکوٹ میں ایک مسجد تعمیر کرائیـخلجیوں اور تغلقوں کے عہد میں بھی شورکوٹ صوبہ ملتان کے ماتحت تھاـ جب سلطان محمد تغلق نے ملتان کے گورنر کشلو خان کو حکمِ عدولی پر قتل کروا دیا تو اس کا سر کاٹ کر شورکوٹ، جھنگ اور چنیوٹ شہروں میں پھرایا گیاـ جب ملتان پر لنگاہوں کی حکومت قائم ہوئی تو حسین خان لنگاہ نے شورکوٹ کی حکومت جام بایزید کے حوالے کر دیـ جام بایزید کو اہل علم سے بڑی عقیدت تھی اور اس کے دربار میں عالمِ فاضل اعلیٰ عہدوں پر فائز تھےـ ان میں شیخ جمال الدین قریشی بھی تھےـ آپ نابینا ہو چکے تھے مگر اس کے باوجود جام بایزید نے ان کو اپنا وزیر بنایاـ اس طرح مولانا عزیز اللہ تلنبھی جو لنگاہوں کے ابتدائی دور میں دہلی چلے گئے تھے جام بایزید کی شہرت سن کر شورکوٹ آ گئےـ جام بایزید نے شہر سے باہر نکل کر ان کا استقبال کیاـ شاہی مہمان خانہ میں جب موصوف نے ہاتھ منہ دھویا تو ان کا مستعملہ پانی بایزید نے لے کر اپنے محل کے اندر بطور برکت چھڑکاـ آپ مدت تک شورکوٹ میں رہے مگر شیخ جمال الدین قریشی سے ان کی نہ بن سکی اور آپ نے رات کے وقت چپکے سے شورکوٹ چھوڑ دیا اور ملتان چلے گئے 43۔ جام بایزید نے اپنے دور میں شورکوٹ کے تباہ شدہ قلعہ اور ملحقہ عمارتوں کی کھدائی کرائی تاکہ اس جگہ کو ہموار کر کے نئی عمارتیں تعمیر کرائی جائیںـ کھدائی کے دوران قلعہ سے کافی مقدار میں خزانہ نکل آیاـ جام بایزید نے خزانہ سلطان حسین خان لنگاہ کے پاس بھجوا دیاـ اس نے نصف ملتان کے فقراء میں بانٹ دیا اور نصف شورکوٹ کے فقراء کے لیے واپس کر دیاـشیر شاہ سوری کے عہد میں شورکوٹ کو ایک نئی زندگی ملیـ اس نے تاج الدین سوری کو علاقے کا منتظم مقرر کیا تھاـ یہ شخص نہایت نیک اور عبادت گزار تھاـ اس نے شورکوٹ کے برباد شدہ قلعہ کا ملبہ صاف کرانے کے لیے لاکھوں روپے صرف کیےـ اس کی خواہش تھی کہ ملبہ ہموار کر کے اسی جگہ دوبارہ شہر بسایا جائےـ مگر دو سال کی تگ و دو کے بعد جب قلعہ کا ایک کونہ بھی ہموار نہ ہوا تو اس نے کام بند کر دیا اور شہر اس برباد شدہ قلعہ کے مشرق میں بسایاـ شورکوٹ کا موجودہ شہر اسی کے وقت آباد ہوا تھاـ اس نے شہر کے تین اطراف چھوٹے چھوٹے قلعے تعمیر کرائےـ شورکوٹ سے ملتان اور دیپالپور کے لیے سڑکیں بنوائیںـ اس کا عہد اس علاقے کے لیے تعمیراتِ عامہ کا عہد شمار ہوتا ہےـ اس نے مساجد تعمیر کرائیںـ شہر کی فصیل کے ساتھ عیدگاہ اور جامع مسجد بنوائیںـ اس کا انتقال 1000ھ میں ہوا اور اس کا مزار آج بھی بھرو کے اوپر مرجعِ خلائق ہے 44۔مغل بادشاہ شاہجہان کے عہد میں حضرت سلطان باہو کے والد محترم سلطان بایزید کو ان کی فوجی اور تبلیغی خدمات کے صلے میں قلعہ قہرگان کے قریب دریائے چناب کے کنارے اور شورکوٹ میں جاگیر مرحمت ہوئی تھیـ مقامی طور پر اس علاقے میں سیال یہاں کے حاکم رہےـ جن کا مرکز جھنگ تھاـ اٹھارویں صدی میں ولی داد خان کے زمانے میں شورکوٹ کے کاٹھیا قبیلے نے بغاوت کی تو اس نے ان کا سدِباب کیاـ بالآخر جب رنجیت سنگھ کے دور میں سکھوں نے ملتان پر پے در پے حملے کیے تو شورکوٹ کو بھی انہوں نے خوب لوٹا اور اس کی بڑی بڑی عمارتوں کو جلا کر راکھ کر دیاـ شہر میں چار ہزار گھر اور ایک ہزار دکانیں بچ رہیںـ باقی سب کچھ برباد کر دیا گیاـ چنانچہ ایک مدت تک یہ شہر ویران رہاـ جب امن ہوا تو پھر سے یہ آباد ہونا شروع ہوا مگر اس کی پہلی سی رونق اور شان وشوکت برقرار نہ رہ سکیـ پرانی آبادی کے آثار اب ویران رہاـبھی مل جاتے ہیں 45۔یہ قصبہ ساندل بار کا حصہ ہے جس میں ہر سو جنگل ہی جنگل ہوا کرتے تھےـ شہر کے اردگرد کھجوروں کے درخت اور باغات تھےـ دریائے جہلم اور چناب اس کے قریب ہی آپس میں مل جاتے ہیںـ 1848ء میں پنجاب پر انگریزوں کے قبضے کے بعد اسے جھنگ ضلع میں شامل کیا گیاـ 1861ء تک تحصیل قادر پور تھیـ اس سال شورکوٹ کو تحصیل بنا دیا گیاـ اس دوران یہاں تھانہ، کچہری، ڈسپنسری اور ٹاؤن کمیٹی قائم کی گئیـ 1868ء میں شورکوٹ تحصیل کی آبادی 79785 اور 1881ء میں 195342 افراد پر مشتمل تھی 46۔ جبکہ شہر شورکوٹ کی آبادی 1881ء میں 2283 نفوس پر مشتمل تھیـ آج یہ شہر 60 ہزار کے قریب آبادی رکھتا ہےـ اس کے قریب ہی شورکوٹ کینٹ کا علاقہ ہے جہاں فوجی چھاؤنی اور پاک فضائیہ کا ہوائی اڈہ بھی ہےـ یہ علاقہ شورکوٹ روڈ کے نام سے 1910ء میں وجود میں آیا اور یہاں ریلوے جنکشن قائم ہواـ یہاں 1967ء میں چھاؤنی قائم ہوئی تو آبادی بڑھنی شروع ہوئیـ شورکوٹ شہر میں طلباء و طالبات کے علیحدہ علیحدہ ڈگری کالج، چناب کالج، فاسٹ انسٹیٹیوٹ آف کمپیوٹر سائنسز، جبکہ شورکوٹ کینٹ میں پی اے ایف ڈگری کالج، آکسفورڈ کالج جبکہ متعدد سرکاری و غیر سرکاری سکولز موجود ہیںـ اس کے علاوہ یہاں تحصیل سطح کے دفاتر، عدالتیں، تحصیل ہیڈ کوارٹر ہسپتال، قومی بینکوں کی شاخیں موجود ہیںـ صوفی بزرگ حضرت سلطان باہُوؒ یہاں پیدا ہوئے تھےـ ان کا مزار بھی قریب ہےـ قدیم قلعے کی باقیات ابھی تک موجود ہیںـ اس قلعے کے بارے میں ماہرین ابھی تک یقین نہیں کر سکے کہ یہ کب تعمیر ہواـ کیونکہ یہاں سے دستیاب ہونے والی مہروں، سکوں، ظروف، انسانی اور حیوانی ڈھانچوں، نُجُوم اور الواح وغیرہ کا تعلق سمیری عہد سے لے کر مسلم عہد تک پھیلا ہوا ہےـ اس قلعے کے کھنڈرات تقریباً ایک سو بیس ایکڑ رقبے پر پھیلے ہوئے ہیں اور پھر مغرب میں دریائے چناب تک مزید چھوٹے چھوٹے کھنڈر ہیں جو اسی قلعہ کی غالباً چوکیاں تھیںـ اصل میں قلعہ شورکوٹ جو قدیم تہذیبوں کا گہوارہ تھا، سب سے زیادہ سکندرِ یونانی کے حملہ میں متاثر ہوا اور اس دور کے بعد پھر قلعہ شورکوٹ اپنی اصلی حالت پر قائم نہ رہ سکاـ اس قلعے کے آثار شورکوٹ شہر میں داخل ہوتے ہی دیو ہیکل پہاڑ کی طرح آپ کو نظر آئیں گےـ شورکوٹ شہر سے جانب شمال تقریباً ایک فرلانگ کے فاصلے پر ایک چھوٹے قلعہ کے کھنڈرات موجود ہیں اس جگہ کو گھپ پنڈی کہا جاتا ہےـ قیاس ہے کہ یہاں کسی زمانہ میں شاہی محل تھا اور محل کے ساتھ ایک خوبصورت مندر بھی تھاـ شاہی محل سے ایک فرلانگ دُور قلعہ پنڈی ابنِ شاہ کے نام کے قدیم آثار بھی ہیںـ اس بلند ٹیلے پر مختصر سا قبرستان بھی ہے اور ابنِ شاہ نامی بزرگ کا مزار بھیـ اسی قلعہ سے یونانی عہد کی مہریں اور سکے مسلسل دستیاب ہوتے رہے ہیں، یہاں بھی ایک مندر کے نشان ملتے ہیں جہاں گھی کے چراغ جلتے تھے 47۔ اسی طرح شورکوٹ شہر کے شمال میں ماڑی ہیڈ سے تقریباً سات کلومیٹر جانب مغرب میں ایک قدیم شہر اور قلعہ اور شورکوٹ سے آٹھ کلومیٹر دُور جانبِ مشرقی بنگلہ فرید محمود کے قریب قدیم قلعہ کے آثار موجود ہیںـ
علم و ادب اور روحانیت کے حوالے سے شورکوٹ کو اصل شہرت حضرت سلطان باہُوؒ کے طفیل حاصل ہوئیـ آپ 1629ء میں حضرت بازید محمد کے ہاں پیدا ہوئےـ شورکوٹ کا قلعہ قہرگان ان کا مسکن تھاـ مورخین کے مطابق آپ کی تصانیف کی تعداد 140 ہے مگر اس وقت صرف 26 کتابیں ملتی ہیںـ ان کی تصانیف کا موضوع تصوف، توحید اور فنافی اللہ کے مقامات پر محیط ہیںـ فارسی، عربی اور پنجابی کے قادر الکلام شاعر تھےـ پنجابی ابیات زبانِ زدِ عام ہیںـ یہاں کی دیگر علمی و ادبی شخصیات میں میاں خیر محمد اعوان، صاحبزادہ رفعت سلطان، پروفیسر صاحبزادہ الطاف علی، شاد عباس گیلانی اور فیض شورکوٹی قابلِ ذکر ہیںـ ان میں سے صاحبزادہ رفعت سلطان خانوادۂ حضرت سلطان باہُو کے فرزند اور ملک کے مشہور غزل گو شاعر ہیںـ 1930ء میں پیدا ہوئےـ “ایمن” اور “آواز” ان کے شعری مجموعے شائع ہوئےـ اسی خانوادے کے پروفیسر صاحبزادہ الطاف علی بلوچستان کے ایک کالج میں درس و تدریس سے وابستہ ہوئےـ آپ نے سلطان العارفین کے پنجابیابیات کا اردو میں ترجمہ اور تشریح کتابی صورت میں شائع کیا۔ شاد عباس گیلانی غزل، مرثیہ اور قصیدہ کے شاعر ہیں، علمِ جعفر پر ان کی متعدد کتابیں شائع ہو چکی ہیں۔ ادیب اور نقاد ناصر عباس نیر اور شاعرہ فرخ زہرا گیلانی کا تعلق بھی شورکوٹ سے ہے۔ ناصر عباس نیر شعبہ اردو پنجاب یونیورسٹی میں استاد ہیں۔ دن ڈھل چکا تھا، چراغ آفریدیم، جدیدیت سے پسِ جدیدیت تک، نظیر صدیقی، جدید اور مابعد جدید تنقید، ساختیا ت ایک تعارف، مجید امجد شخصیت و فن، لسانیات اور تنقید آپ کی تصانیف ہیں۔ فرخ زہرا گیلانی کے شعری مجموعے کبر کے اس پار، بنتِ حوا کے نام سے شائع ہوئے۔ انجینئرنگ کے شعبے میں نمایاں مقام حاصل کرنے والے سیدظہور حسین شاہ شورکوٹ کے فرزند ہیں۔ اقوامِ متحدہ کے فنڈ سے قائم ہونے والے اداروں کے فنی مشیر ہیں 48۔شورکوٹ میں حضرت سلطان باہُوؒ کے والد محترم ابو یزید محمد کے علاوہ تاج الدین سوری، حضرت غازی پیر، میر شہداء، بالن، پیر اور شاہ محبوب عالم نامی بزرگوں کے مزارات بھی موجود ہیں۔ حضرت ابو یزید محمد کی ولادت 997ھ اور وفات 1056ھ میں ہوئی۔ آپ سلسلہ قادریہ اور سہروردیہ سے بیعت تھے۔ آپ کے مزار پر سارا سال رونق رہتی ہے۔ حضرت غازی پیر جن کا اصل نام جلال الدین تھاـ محمد بن قاسم کی فوج کے ساتھ شورکوٹ آئے تھے۔ آپ بڑے جنگجو اور بہادر تھے اور ساتھ ہی صاحبِ جلال بزرگ تھے۔ محمد بن قاسم نے آپ کو یہاں کا حاکم مقرر کیا تھا۔ 132 ہجری میں آپ کا انتقال ہوا۔ ہر سال چیت کے تیسرے جمعہ کو آپ کا عرس منایا جاتا ہے جس میں ہزارہا عقیدت مند شامل ہوتے ہیں 49۔ تاج الدین سوری، شیر شاہ سوری کے دور میں یہاں کے حاکم تھے۔ آپ سہروردیہ سلسلہ کے درویش تھے۔ آپ کا انتقال 700 ہجری میں ہوا اور مزار بھو کی بلندی پر آپ کی وصیت کے مطابق تعمیر ہوا۔ میر شہداء بھی شورکوٹ کے حاکم تھے۔ آپ کا انتقال 995 ہجری میں ہوا تھا آپ کو بھو کے عقبی حصے میں ساحلِ چناب کی جانب دفن کیا گیا۔ آپ عالمِ باعمل تھے۔ بالن پیر کا اصل نام اللہ بخش تھا۔ آپ کی وفات 1030 ہجری میں ہوئی۔ حضرت محبوب عالم کا شجرۂ نسب پندرھویں پشت میں سید عبدالقادر جیلانی سے ملتا ہے۔ آپ کی ولادت 1011 ہجری میں ہوئی اور 1091ھ میں وفات پائی۔ آپ کے مزار کی عمارت کے نقش و نگار میں مغلیہ فنِ تعمیر جھلکتا ہے 50۔ شورکوٹ شہر میں مین بازار، عثمانیہ روڈ مارکیٹ، شاہد شہید روڈ مارکیٹ، غلہ منڈی، ہنری منڈی کا کاروباری مراکز جبکہ محلہ عباس پورہ، محلہ قریشیاں والا، محلہ میدان والا، یو کے سٹی ٹاؤن اور الکرم ٹاؤن وغیرہ رہائشی علاقے ہیں۔ شورکوٹ کینٹ، شورکوٹ شہر سے تقریباً 20 کلومیٹر کے فاصلے پر واقع ہے۔ اسے اب رفیقی ایئر بیس کا نام دیا گیا ہے۔ یہاں طلباء کے دو طالبات کے دو ہائی سکول، پی اے ایف کالونی، تھانہ اور ریلوے اسٹیشن موجود ہیں۔ انگریزی عہد میں یہاں ریلوے اسٹیشن قائم کیا گیا تھا۔ یہ ایک جنکشن ہے اور یہاں سے لاہور، ملتان اور فیصل آباد کی طرف ریل گاڑیاں جاتی ہیں۔ یہاں کا گورنمنٹ ہائی سکول فار بوائز 1927ء میں پرائمری کی سطح پر قائم ہوا تھا۔ 1962ء میں اسے مڈل اور 1963ء میں ہائی کا درجہ ملا 51۔ یہاں کی اکثر آبادی پاک فضائیہ کے ملازمین پر مشتمل ہے۔ شورکوٹ شہر کی آبادی 1981ء میں 18533 اور 1998ء میں 27762 نفوس پر مشتمل تھی۔ اب اس کی آبادی 40 ہزار کے لگ بھگ ہے۔ جبکہ شورکوٹ کینٹ کی آبادی 1972ء میں 26020، 1981ء میں 132035 اور 1998ء کی مردم شماری کے مطابق 125510 افراد پر مشتمل تھی۔ 2017ء کی مردم شماری کے مطابق شورکوٹ شہر کی آبادی 132962 اور شورکوٹ کینٹ کی آبادی 37709 نفوس پر مشتمل ہے